ဘုရားရှင်က လူတွေကို မိုးသုံးမျိုးနဲ့ ဥပမာပေး ဟောကြားတော်မူခဲ့ပါတယ်။
၁။ လုံးဝမရွာသောမိုးနဲ့တူသောသူ
၂။ ကွက်ကြားမိုးနဲ့တူသောသူ
၃။ အနံ့အပြားရွာသောမိုးနဲတူသောသူ
.
လုံးဝမရွာသောမိုးနဲ့တူတဲ့သူ
---------------------------
လုံးဝမရွာတဲ့မိုးနဲ့တူတဲ့လူဆိုတာ ဘာမှ စွန့်ကြဲခြင်းလှူဒါန်းခြင်းမရှိတဲ့သူကို ပြောတာ။ ဘယ်လိုပုဂ္ဂိုလ်မျိုးကိုမှ လှူလေ့မရှိပဲ ကိုယ့်အတွက်ပဲ စုဆောင်းနေတဲ့သူပါ။ ကိုယ့်ပစ္စည်းကုန်ခန်းသွားမှာကို ကြောက်နေတယ်။ မျက်စဉ်းခတ်ပါများရင် ကုန်သွားသလိုပဲ ပစ္စည်းတွေဟာလည်း တစ်စတစ်စပေးပါများရင် ကုန်သွားမှာကို စိုးရွံ့နေတယ်။ ဒါကြောင့် သူ့ဟာ လုံးဝမရွာတဲ့မိုးနဲ့တူတဲ့သူပါ။
ကွက်ကြားမိုးနဲ့တူတဲ့သူ
-----------------------
မိုးဟာ တစ်ခါတစ်လေမှာ အချို့နေရာမှာ ရွာတယ်။ အချို့နေရာမှာ မရွာဘူး။ အလားတူပဲ အချို့သူတွေဟာ ကိုယ်နဲ့ခင်တဲ့ရဟန်းသံဃာ၊ ကိုယ်လေးစားမြတ်နိုးတဲ့ပုဂ္ဂိုလ်၊ ကိုယ်နဲ့ အဆင်ပြေတဲ့သူတွေကိုပဲ ရွေးချယ်ပြီးလှူတယ်။ ကျန်တဲ့အယုတ်အလတ်အမြတ်ပုဂ္ဂိုလ်တွေကို လှူလေ့မရှိပါဘူး။ သူကတော့ ကွက်ကြားမိုးနဲ့တူပါတယ်။
အနံ့အပြားရွာတဲ့မိုးနဲ့တူတဲ့သူ
----------------------------
အနံ့အပြားရွာတဲ့မိုးဟာ ကုန်းပြင်၊ မြေညီ၊ ချိုင့်ဝှမ်းအားလုံးကို အနံ့အပြားရေဖြင့်ပြည့်အောင် ရွာတယ်။ အဲလိုပဲ အချို့သူတွေဟာ ခင်တာ မခင်တာ၊ သိတာမသိတာ။ ယုတ်လတ်မြတ်မရွေး ရောက်လာတဲ့အလှူခံမှန်သမျှကို စေတနာထက်ထက်နဲ့ ပေးလှူလေ့ရှိပါတယ်။ ဒါကြောင့် သူကို အနံ့အပြားရွာတဲ့မိုးနဲ့တူတယ်လို့ပြောတာပါ။
တတိယမိုးကတော့ စစ်မှန်တဲ့မိုးပါပဲ။ မျှတတယ်။ မခွဲခြားဘူး။ အဲလိုပဲ အလှူလုပ်တဲ့သူတွေဟာလည်း တတိယမိုးလို ကျင့်ရပါမယ်။ ဘယ်ပုဂ္ဂိုလ်၊ ဘယ်ဂိုဏ်းဂဏ၊ နာမည်ကြီးတာ၊ မကြီးတာ မခွဲခြားရပါဘူး။ လိုအပ်နေတဲ့နေရာ၊ လိုအပ်နေတဲ့ လူမှုအဖွဲ့အစည်း၊ လိုအပ်နေတဲ့ ပရဟိတလုပ်ငန်းများစသည်တွေမှာ တက်နိုင်သလို လှူတတ်ရပါမယ်။ ဘုရားလောင်းတို့ရဲ့ အလှူပေးနည်းပါပဲ။
လုံးဝမလှူမရင် လုံးဝအကျိုးမရပါ။ ခွဲခြားလှူရင် ခွဲခြားပြီးတော့ပဲ အကျိုးပေးပါမယ်။ မခွဲခြားပဲနဲ့ တွယ်တာမှုမရှိ လှူရင်တော့ အချိန်အခါ နေရာဒေသမခွဲခြားပဲ ဒါနအကျိုးတရားတွေကို ရရှိခံစားနိုင်ပါတယ်။
အားလုံးအနံ့အပြားရွာတဲ့မိုးနဲ့တူအောင် ကျင့်ကြံနေထိုင်နေကြပါစေ။ဓမ္မစမ်းရေ..
0 comments:
Enregistrer un commentaire